Зградата на поранешната фабрика Купром треба да биде културна оаза на Скопје, сметаа од Зелен Хуман Град.
- Дозволувањето на вакви објекти да останат запуштени сред градска средина, или уште полошо, да се претворат во нови бетонски џунгли , ќе претставува уште еден пораз за Скопје. Локација совршена за културен центар, од настани, до галерии, до концерти и простор за секој скопјанец и скопјанка да избегааат од секојдневниот хаос. Локација каде без многу напор, институциите може да ја претворат во културна оаза на Скопје, велат од иницијативата за зелено и хумано Скопје.
Оттаму велат дека постојат мал милион начини тоа да се постигне, дали преку приватно-јавно партнерство со сегашните сопственици на парцелата, дали преку експропријација (откупување) на земјиштето преку Општина Ѓорче Петров или Град Скопје, или негова пренамена преку новиот ГУП што уште е во изработка.
Од ЗХГ велат дека за ова да стане реалност самите граѓани треба да извршат притисок.
- Борбата за која било тема во Скопје и во Македонија, мора да се одвива заеднички, синхронизирано, и со инволвираност на сите граѓани. Не оставајте борбата да ја води една организација, една група или еден човек, надејаќи се и давајќи поддршка само преку социјални медиуми. Сплотете се, само масовноста прави вистински промени во Македонија! - додаваат оттаму мотивирајќи ги граѓаните на активизам.
Фабрика Купром е изградена во 1940-тите според посебни индустриски стандарди, поради што денес, иако е запуштен повеќе од 15 години, неговите главни носечки столбови и контрукцијата се наоѓаат во извонредна состојба, што го прави погоден за реупотреба и ревитализација. Овој историски објект, е дел од колективната меморија на граѓаните, а поради оваа фабрика се развиваат населбата Хром и околните населби, како и целата Општина Ѓорче Петров.
