Веќе се отпочнати активностите за новиот Луна Парк во Скопје. Ова го соопшти Град Скопје во соопштението кое го испрати до медиумите, а со истото сакаат да ги демантираат, како што велат, лажните вести кои се пласираат во дел од медиумите.
- Хаосот создаден во Луна Паркот со дивото издавање дозволи на дискотеки на лица блиски до претходните раководства во градот го одложи проектот, како и поништување на еден готов проект и изготвување на комплетно нов проект нарачан од претходното градско раководство. Сепак, сите проблеми се отстранети, а на локацијата веќе се отпочнати активностите за новиот Луна Парк, наведуваат во писменото соопштение.
Во истото соопштение констатираат дека што се однесува на автобускиот превоз, истиот е бесплатен за пензионери, ученици и студенти.
- Дополнително, во најголемата енергетска и економска криза по онаа од 2008 година, градот Скопје ја здржа старата цена на билетите и покрај драстичното зголемување на енергенсите. Дотолку повеќе што, градот Скопје не зголеми ниту една друга давачка на граѓаните, напротив ги намаливме цените на зонските паркиралишта за 25 проценти, велат оттаму и додаваат дека набавката на нови 250 еколошки автобуси до овој момент втора година по ред е блокирана.
- До овој момент завршени се три мега-паркови и тоа во Ѓорче Петров на површина од 32 илјади метри квадратни, Аеродром на површина од 27 илјади метри квадратни, и во Чаир на површина од 30 илјади метри квадратни. Во тек е изведбата на мега-паркот во општина Карпош и Кисела Вода, се наведува во истото соопштение од Град Скопје.