Изминатите денови, речиси насекаде низ градот, можеа да се забележат деца, но и повозрасни лица, кои уживаат во ладната вода што тече во декоративните фонтани низ метрополата.
Површинската фонтана, пак, е најинтересна за децата, кои уживаат претрчувајќи низ млазовите вода што од дното на фонтаната се испуштаат.
Голем број капачи има и во езерцето во Градскиот парк, каде што преку ден граѓаните се освежуваат, а слична е сликата и во водите на Вардар.
Меѓутоа, граѓаните воопшто не размислуваат дека со капењето во градските фонтани прават ненамерна штета што надлежните постојано мора да ја санираат. Така беше и минатото лето, кога настрадаа пумпите од кои прска вода, поради трчањето на децата.
Градските власти за овој проблем информираат дека службата за обезбедување редовно реагира при капење во фонтаните.
- Ако е направена штета, сторителот се пријавува во полиција и се поднесува соодветна пријава - велат од градот.
Сосема друг проблем е техничката исправност на водата, односно нејзиниот квалитет, кој е доста дискутабилен особено кога станува збор за капење во водата во езерцето во Градскиот парк.
Надлежно за квалитетот на езерото во паркот е јавното претпријатие „Паркови и зеленило“, од каде што велат дека капењето во езерцето во Градскиот парк е строго забрането.
