Денеска се одржа конфереција Влијанието на корупцијата и непотизмот врз реформите, платите и капацитетите на јавниот сектор“,каде стана збор за Клиничкиот центар. Учесниците на оваа конференција изнесоа фрапантни податоци. Претседателот на Самостојниот синдикат на вработените во универзитетските клиники, центри, клинички болници и други јавни здравствени установи во земјава, Предраг Серафимоски кажа дека порано со еден директор цела клиника имала долг од 6 милиони евра за сега само Онкологија да должи 20 милиони евра
- “Клиничкиот центар брои 36 клиники и има комплетен буџет од околу 9 - 10 милиони евра. Кога беше еден, до 2008 - 2009 година, со еден директор и еден Управен одбор, најголемиот долг изнесуваше околу 6 милиони евра, а сега преку 20 милиони евра долг има само Клиниката за онкологија. Се ставија многу директори, од еден на времето, сега има 66 заедно со економските, како и 36 управни одбори. Тоа значи дека на месечно ниво се трошат огромни суми пари. Ако тие се вложат паметно и ако се врати Клинички како што беше до 2008-ма, ќе има голем бенефит и за здравствените работници и за народот“, рече Серафимоски.
Закони има, напомена Серафимоски, но некој треба да ги спроведува. Ако се утврди коруптивна зделка, треба да има високи казни и тие да се почитуваат. Претседателот на Самостојниот синдикат, „излезот“ го гледа, пред се, во зголемување на платите на лекарите и медицинскиот персонал. Без тоа, како што потенцира, залудно е да се градат или да се модернизираат болниците.
- “Корупцијата во нашето општество е општо прифатена норма, а позната е уште како „бакшиш“. Перцепцијата на граѓаните е дека во здравството има голема корупција, и во јавното и во приватното. Во приватното здравство каде платите се далеку поголеми, постои тенденција граѓанинот, за да заврши работа за добро на своето или здравјето на фамилијата, сака да го почести докторот. Но, така е и во јавното здравство - тоа ни е веројатно во генот. Која било партија да е на власт, прво треба да се зголемат платите во здравството, инаку е се залудно. Залудно е да се прават болници и да се модернизизраат ако лекарите и останатиот медицински персонал масовно бегаат и има егзодус, најмногу во Германија и Австрија, а во последно време и во Шведска и Норвешка. Ако продолжиме со оваа политика, за кратко време ќе нема кој да го лечи народот, ќе се вратиме на бајачки, истакна Серафимоски и повтори дека од 450 доктори, 430 земаат лиценци на англиски и германски јазик.
Ова, дополни, треба да им биде јасно на сите политичари.
- “Вака веќе не може. Фондот е максимално искористен, се испумпуваат пари во приватните здравствени организации, а сите најтешки пациенти повторно завршуваат во јавното здравство. Треба да се сменат законите за нулта толеранција на корупција и да се прибилижиме кон европските норми, но без зголемување на платите се друго е ирелевантно“, рече Серафимоски.
