Семејствата на починатите 14 пациенти во големата трагедијата по пожарот во модуларната болница во Тетово на 8 септември 2021 година, денеска во СВР Тетово најавија нови јавни протести преку кои повторно ќе излезат пред институциите и ќе бараат да има ново обвинение.
-Очекуваме ново обвинение. Ние од почетокот бараме правда и очекуваме правда, но во оваа држава се гледа дека нема правда. Но излегува вистината кој е крив. Јас спомнав неколку пати дека не се овие тројца, имаат нешто вина ама има и поголем синџир. Тие од ИРЛ новинарите ја извадија вистината кој е виновен, а кој не е виновен – изјави Мумин Исмаили, кој во пожарот ги загубил братот и мајката.
Во петок најавија дека собирот ќе почне кај модуларната болница.
За потсетување, на 5 јуни 2023 заврши судскиот процес за кривичните дела поврзани со пожарот во модуларната болница Тетово. Условна осуда добија обвинетите директори Флорин Бесими и Артан Етеми за кривично дело „тешки дела против општата сигурност“, додека правното лице ЈЗУ Клиничка болница беше прогласено за виновно за делото „предизвикување општа опасност“. Судот одлучи да има ослободителна пресуда за докторот Бобан Вучевски и Клиничка болница за делото „непостапување по здравствени прописи“.
