Вчеравечер, во општина Аеродром, градоначалникот на општината, Тимчо Муцунски, заедно со претседателот на советот на општината, Дејан Митески, претставници од советот на родители во основните училишта и командирот на ПС Аеродром, Тони Петровски, извршија ноќна патрола на неколку локации од општината.
Во рамките на оваа патрола посетени беа неколку паркови, училишта, градинки, игралишта и други места каде вообичаено се собираат граѓаните во ноќните часови, со цел да се лоцираат и превенираат евентуални нарушувања на јавниот ред и мир.
Со лицата кои беа затекнати на различни локации низ општината, тимот на ноќната патрола имаше пријателски разговор за законските правила и прописи кои се однесуваат на зачувувањето на јавните површини и јавниот ред и мир, како и потребата од заеднички активен ангажман за одржување на чистотата и мирот во општината. За време на патролата претставниците ја истакнаа нивната заложба за чување и одржување на урбаната опрема и јавниот простор, како и за засилениот ангажман на МВР за подобрување на безбедноста на граѓаните.
„Аеродром е познат по единството, по маалската дружба во парковите и токму затоа како општина ќе работиме сето тоа да одржиме и насочиме во корист на промовирање на свеста за чување на она што е заедничко и во кое ќе уживаме и ние, но и идните генерации“, напиша на својот фејсбук профил градоначалникот на општината.