„Спомнете им на ОБСЕ гостите дека може да им биде малку лошичко, да кашлаат, да не можат да дишат и да имаат необјасниви алергии, не од возбуда, секако“, ова на својот фејсбук профил во пресрет на самитот на ОБСЕ кој се одржува следната недела во Скопје го напиша Ели Пешева која е дел од 02 Иницијативата што се бори против загадувањето на воздухот.
Таа предложи покрај менијата со храна и пијалак, организаторите да им кажат и што ќе дишат и додаде дека бројот на починати како последица од загадувањето за една година е зголемен за 30 проценти.
„Пошто 5600 семејства изгубиле некој свој близок, како последица од загадувањето во државава (зголемување за 30% за само една година). Во најава е носење на буџетот за следната година во кој стапката за заштита од загадување ќе го достигне историски најнискиот праг“, додаде во својот фејсбук статус и со честитка за „немање појма од приоритети“.
Во едно од гостувањата на Телма Телевизија, Пешева констатираше дека една работа е заедничка за сите партии во Македонија и за сите влади во изминатите 10-тина години, а тоа е незаинтересираноста за животната средина.
Околу 98 отсто од европските граѓани дишат отровен, многу штетен загаден воздух, кој е поврзан со околу 400.000 смртни случаи годишно, а Македонија е најтешко погодена, покажа истражувањето на британскиот дневен весник „Гардијан“.
Триесеттиот Министерски совет на Организацијата за безбедност и соработка во Европа ќе се одржи на 30 ноември и 1 декември, во салата Борис Трајковски во Скопје. Настанот се одржува во рамки на македонското претседавање со оваа меѓународна организација.