„Е кога би имало избори на секои шест месеци, граѓаните би се офајдиле“, велат на шега Македонците алудирајќи дека предизборно државата нуди помош во вид на ваучери и субвенции за голем број категории на граѓани. Но, не секогаш сите кои ги исполниваат критериумите стигаат до помошта.
На оваа тема со свој став сподели Калина Коси. Ова е нејзиното размислување:
- Ваучери за клими, тротинети, сега читам и за годишен одмор вон сезона. И кажуваат таму кои се критериумите и за колку ваучери обезбедиле пари. Е сега, ако на пример 10.000 граѓани ги исполнуваат критериумите и поднеле барање, а ваучери има само за 2000 граѓани, прво ме интересира зошто даваат само на 2000? Второ, со кое образложение ќе ги известат преостанатите 8000 дека се одбиени, односно зошто? И трето, како ги бираат тие 2000 од масава од 10.000? Мора да има некој дополнителен критериум, иако сите треба да сме по некоја логика рамноправни. Кој е тој критериум да ми е да знам... а знам.
Партиска книшка, послушност, број на излепени плакати, број на лајкови и коментари на социјални мрежи од типот „Браво директоре/министре/премиере најдобри сте!“? Роднина, пријател, љубовница? Искрено, ако не си едното или другото, џабе не стој во редот!