Државниот санитарен и здравствен инспекторат ја доби одлуката од министерот за здравство за засилени контроли во градинките во согласност со препораката на Комисијата за заразни болести. Комисијата препорача нецелосно вакцинираните и невакцинираните деца да не одат во градинка за да се заштит себе, но и другите, поради епидемијата на голема кашлица во Скопје.
„Државниот санитарен и здравствен инспекторат ја доби одлуката од Министерот за здравство врз основа на препораките од Комисијата за заразни болести, да изврши вонредни инспекциски надзори и забрани прием на деца во предучилишни установи, кои не се имунизирани со вакцината дитепер или се нецелосно имунизирани со оваа вакцина. Вонредните инспекциски надзори ќе почнат в понеделник на 11.3.2024 година со издавање решение за забрана на прием на деца што не се имунизирани со дитепер или се нецелосно имунизирани со дитепер и други наложени епидемиски мерки“, велат од Инспекторатот.
Инспекторите ќе ги задолжат одговорните лица во предучилишните установи да изготват список на сите невакцинирани деца со дитепер, ќе им советуваат да не се примаат деца со други инфективни заболувања, како и за секое зголемено отсуство да биде известен Центарот за јавно здравје Скопје.
- ДСЗИ нема надлежност да проверува вакцинален статус на децата при редовните надзори. Надлежноста е да ги санкционира родителите што не ги однеле своите деца на редовна вакцинација. Ги повикуваме и казнуваме родителите, глобите се движат од 300 до 650 евра во денарска противвредност, изјави дректорката на ДСЗИ Рената Младеновска минатата недела.
