Градоначалникот на Кисела Вода Орце Ѓорѓиевски во својот отчет за двегодишната работа на чело на општината порача дека за само две години изградиле подземна инфраструткура како никогаш во минатото.
- Нашата мисија беше да ја донесеме општината во 21 век и мојот народ повеќе да не живее во супстандардни услови. Донесовме вода за пиење онаму каде што немаше и тоа во вкупна должина од 3.610 метри водоводна мрежа. Изградивме и фекална канализација од 6690 метри и атмосферска во должина од 4470 метри, рече тој и информираше дека следната недела конечно започнува и проектот за фекална канализација во Пинтија, која беше неколку години лажно ветувана.
- Дополнително, се работи и на примарната мрежа за водовод во Драчево и во тек е вградување на поединечните приклучоци. Останува уште населба Стаклара која не е изоставена од моите планови! За многу кратко време ќе започнат градежните активности за изведба на фекална и водоводна мрежа, дел од средствата се обезбедени и наскоро ќе стартуваме со работа. За првпат во историјата, Кисела Вода нема да има населено место без подземна инфраструктура! - вели првиот човек на општината во својот отчет.
