Денеска рано наутро пред изгрејсонце, домаќинките ги бојадисуваат првите велигденски јајца. Најпрво каснуваат малку леб, се вртат кон исток, се прекрстуваат и ги бојат првите три црвени јајца. Колку оваа традиција ја почитуваат денешните млади домаќинки?
-Секоја година на Велики Четврток бојадисувам три јајца. Не ми е тешко да станам пред изгрејсонце и да го направам овој адет кој со години го правеле мојата баба и мајка, вели Бети (30 години) од Влае.
Првото јајце, божјаче, откако ке се бојадиса се остава да го „фатат“ првите зраци од сонцето, а потоа се будат децата и со него на лицето им се прави „Црвено-бело“. Божјарчето се чува цела година, до наредниот Велики Четврток, и само ова јајце не скапува!
-Немам навика да го правам овој адет. За оваа работа е задолжена свекрвата, таа вапса три јајца, и на дечињата пред да заминат во училиште им прави „Црвено-бело“ по лицето, кажува Симона (36 години) од Ѓорче.
Велики Четврток — ден од Страдалната Седмица. Според источното христијанство тој е шестти ден од Страсната Седмица, односно пет дена по Лазаровата Сабота и четири по Цветници. А според западното христијанство тој е петти ден од страсната седмица, односно четири дена по Цветници. На овој ден се прави спомен на светото миење на нозете, Тајната вечера, предавањето на страшните тајни, Првосвештеничката натприродна молитва, и самото предавство на Христос.
-Во мојата фамилија, овој адет не се почитуваше, само во сабота се бојадисуваа јајца. Кога се омажив јас почнав да си ја почитувам оваа традиција. Пред работа станувам и си фарбам јајца, вели Снеже (41 година) од Аеродром.
Останатите јајца може да ги бојадисуваат во сабота во различни бои и на различни начин.
-Од пред 5 години почнав сам да вапсам јајца мајка ми почина останав сам.На почетокот ми изгледаше малку чудно мислев дека е нешто тешко, но се радувам на овој празник, веднаш ја совладав техниката и без проблем сега овој адет го терам сам додека не се оженам вели Сашко (33 години) од Лисиче.
Кои се значењата на боите на велигденските јајца:
Црна – вечност
Жолта – светло, среќа
Црвена – божествена љубов, надеж
Кафена – среќа
Бела – чистота, невиност
Портокалова – издржливост и сила
Зелена – раст
Виолетова – надеж и вистина
Сина – здравје.