Куршумот има заканувачка мафијашка порака, но промената почна и ништо не може да ја запре, вели претседателот на Алијансата на Албанците и градоначалник на Гостивар, Арбен Таравари, откако беше пронајден куршум во дворот од неговата куќа.
Таравари пишува дека му е жал за неговото семејство, особено за неговата мајка која лошо ја доживеала целата ситуација, но жал му е и за политичарите кои покажуваат дека нивниот аргумент да замолчат нечиј глас се куршумите.
„Оние што ја држеа оваа земја како заложник се во очај на загуба! Секој што ќе остане без зборови, а му остана само куршумот е во голема неволја… На било кој што го фрлил тој куршум, му велам дека и тешка артилерија да користи, промената почна и ништо не може да ја запре“, пишува Таравари.
„Можете мене да ме убиете, и тоа би било голема загуба за моето семејство и жал ми е што и моите деца го читаат ова…но вие би убиле само еден човек, а што ќе им направите на илјадниците и стотиците илјади луѓе кои веќе се на нозе? Не можете да замолчите, да убивате, да запрете народ! Ви благодарам на сите вас што ме поддржувате! Срцето планина ми го направивте! Ја почнавте промената. Со или без мене – Промената се случи!“, пишува Таравари.
Од полицијата потврдија дека е пронајден неиспукан куршум од автоматска пушка.
