Агенцијата за лекови и медицински средства - МАЛМЕД денес ги достави сите документи побарани од Анкетната комисија со цел целосно расветлување на случајот со Онкологија. Од таму изразува длабока загриженост за случувањата на Клиниката и бара надлежните институции целосно и праведно да го расветлат случајот.
Агенцијата во целост ја поддржува работата на Анкетната комисија за случувањата на истата клиника и во насока на тоа даде придонес со активно учество на седницата на анкетната комисија на 27 и 28 октомври.
Сакаме да ја информираме јавноста дека во целост е одговорено на барањата на Анкетната комисија и доставена е целокупната побарана документација која е во надлежност на МАЛМЕД а во интерес на заштита на јавното здравје на граѓаните.
Агенцијата и покрај тоа што нема надлежност над работата на клиниките и болниците вклучително и ЈЗУ Универзитетска клиника за радиотерапија и онкологија, работи посветено да обезбеди квалитетни и безбедни лекови. Граѓаните треба да бидат спокојни дека со постапките кои ги спроведува Агенцијата согласно законот добиваат квалитетни и безбедни лекови. Приоритет на Агенцијата останува заштита на јавното здравје на граѓаните, се вели во соопштението.
