По прикажувањето на „Златна петорка" во култното берлинско Кино „Бабилон", со македонскиот филм во познатото Кино „Ентрепот" во Париз, се отвори фестивалот SEE à Paris, манифестација посветена на кинематографиите на земјите од Југоисточна Европа.
Филмот „Златна петорка" досега е прикажан на фестивали во Лондон, Сиднеј, Торонто, Бенгалур, Москва, Перуџа, Берлин, Битола, а наскоро ќе има регионални фестивалски претставувања, како и промоција во САД.
Во Москва филмот доби специјална диплома од жирито, а во Перуџа „Златен грифон" за најдобар странски филм.
Во сабота, на 3 јуни, во рамките на фестивалот, режисерот Горан Тренчовски ќе одржи мастер-клас на културолошко-образовниот институт ИНАЛКО (Национален институт за јазици и ориентални цивилизации) во рамките на Универзитетот Сорбона, каде што ќе зборува на темата „Литературата и филмот".