Македонската репрезентација во ракомет со победа го заврши ова Европско првенство во ракомет откако ја совладавме репрезентацијата на Швајцарија со резултат 29:27. Оваа победа е многу важна ако се знае дека нашата репрезентација го обезбеди првиот шешир за баражот за СП 2025 година.
Селекторот Кире Лазаров им ја честиташе победата и борбата на нашите репрезентативци каде посочи дека е многу среќен и задоволен од овој натпревар.
- “Одигравме екстра квалитетен натпревар, со голема борба, голема жар, многу желба за победа и знаете, кога посакувате, тоа им го кажав на момците пред натпревар, не е важна ниту стратегија ниту тактика, само да ја посакуваме победата повеќе од Швајцарија. Така и беше иако и тие посакуваа победа и покажаа на ова ЕП дека се многу квалитетни. Многу сум задоволен и среќен од презентираното на овој натпревар“, рече Лазаров.
Најефикасни во Македонија со по пет погодоци беа Ненад Костески и Марко Митев, одличен меѓу стативите беше Мартин Томовски со 13 интервенции. Кај Швајцарија прво име беше легендарниот Енди Шмид со 11 реализации.
