Драматична е состојбата од невремето Даниел и во Споради. Скијатос остана без вода и струја, како што изјави за ЕРТ хотелиерот Арис Дервенис.
На Скијатос поплавени се куќи и продавници, додека штетите на инфраструктурата се сериозни. Градоначалникот на Скијатос, Тодорис Цумас, побара во општината да биде прогласена во вонредна состојба.
На подрачјето до Противпожарната служба има 109 повици, додека досега се спроведени 20 испумпувања на вода и 20 лица се пренесени на безбедни места.
На видеата објавени на социјалните мрежи, се чини дека пристаништето се „удавило“ во матните води, додека сега, иако нема обилни врнежи, дува многу силен ветер.
Голем број патници останаа заглавени на брод, кој вчера попладне тргна од пристаништето Скијатос кон Волос, но поради механички дефект пловел со мала брзина. Бродот не стигнал до својата дестинација и сега е заглавен, неколку километри од пристаништето Волос, пишува „Прототема“.
Има стотици поплаки од патници кои се заробени на бродот веќе 12 часа. Досега не се разјаснети причините поради кои бродот не влегува во пристаништето.
Најмалку 300 туристи останаа блокирани на аеродромот во Скијатос поради лошото време.
Лошото време не можеше да не влијае и на транспортот, а туристите на островот и кои се подготвуваат за заминување се во драматична ситуација. Британски турист кој повеќе од 12 часа на аеродром чека да полета неговиот авион, ги пренесува сликите кои преовладуваат. Туристите поставија камп внатре во аеродромот обидувајќи се да спијат. Други легнаа врз својот багаж.
„Ужасни сцени. Моментално сме на аеродромот, блокирани сме повеќе од 12 часа и нема летови до четврток. Надреално е“, пишува Британецот.
Во меѓувреме, тој во својот коментар пишува: „Патиштата се затворени, а струјата е прекината во поголемиот дел од градот. На аеродромот има храна и вода. Можеби летовите ќе тргнат во четврток. Дождот престана, но сега дува ветер“.
