Нашиот имунитет е комплициран механизам - тој треба да биде доволно силен за да не одбрани од вируси и бактерии, а сепак да не „се сврти против нас“ во форма на некоја автоимуна болест.
Photo by Diana Polekhina on Unsplash
Важно е да препознаеме кои се добри и здрави начини за поддршка на нашиот имунолошки систем и отстранување на бариерите што го спречуваат да работи оптимално.
Како што старееме, опаѓа нашата имунолошка функција, но без оглед на тоа колку години имате, која сезона е и каква е вашата општа здравствена состојба, секогаш е корисно да работите на зајакнување на вашиот имунолошки систем.
Спијте повеќе
Photo by bruce mars on Unsplash
Не е тајна, веќе го знаеме тоа. Квалитетниот сон во текот на ноќта е еден од клучните фактори кога станува збор за одржување на оптимално здравје, како и за нормално функционирање на имунолошкиот систем. Генерално се препорачува возрасните да спијат седум до осум часа навечер. Постојат студии кои потврдуваат дека само една ноќ на лош сон може да ја намали функцијата на имунитетот и да има негативни ефекти врз нашата благосостојба.
Меѓутоа, кога постојано спиеме лошо (неколку ноќи или месеци по ред, дури и години), тоа навистина може целосно да го урне нашиот одбранбен систем. Добрата вест е дека малите „приспособувања“, или промени во лошите навики се доволни за да го подобриме нашиот сон.
Хранете се здраво
Photo by Anna Pelzer on Unsplash
Ако во вашата исхрана недостасуваат протеини или микронутриенти, како што се витамините Ц и Д, цинк, селен и железо, постои голема шанса тоа да има негативно влијание врз имунитетот. Не е доволно да почнете да јадете т.н суперхрана. Најдобро е стратешки да му пристапите на проблемот и да направите значителни промени во вашето мени. Прво, важно е да ја избегнувате или целосно да ја исклучите преработената храна и да се фокусирате на богатата храна како мешунките, овошјето, зеленчукот и целите зрна.
Потоа, треба да јадете храна која е одличен извор на протеини, бидејќи протеинот се состои од амино киселини, т.н. „гориво за имунолошкиот систем“. Недостатокот на протеини може да доведе до ослабен имунитет и поголем ризик од развој на болести. Во чинијата додадете риба, пилешко и мисирка, посно црвено месо, јајца, како и млеко и млечни производи со малку маснотии. Овие намирници се добри и затоа што содржат значителни количини на витамин Д. Позната е улогата на овој витамин во градењето силни коски, но треба да се знае дека го зајакнува и имунитетот, бидејќи му помага на телото да се бори против вирусите и бактериите и на тој начин да спречи болести како грип.
Не заборавајте на витаминот Ц
Photo by Apostolos Vamvouras on Unsplash
Најпознатиот и веројатно најпопуларниот витамин за зајакнување на имунитетот е витаминот Ц. Дејствува како моќен антиоксиданс и помага да се спречат вирусите и бактериите да влезат во телото. Исто така, помага да се убијат бактериите што влегуваат во вашиот систем и ги поддржува нашите имунолошки клетки за да можат правилно да ја вршат својата работа. Храна богата со витамин Ц се цитрусните плодови, пиперките, доматите, брокулите, кивите и тн.
Управувајте со стресот
Photo by Elisa Ventur on Unsplash
Кога сме постојано изложени на стрес, ја намалуваме способноста на нашиот имунолошки систем ефикасно да ја врши својата работа. Затоа е важно свесно да се фокусираме на одржување на стресот под контрола и да го прилагодиме нашиот одговор, т.е. реакција на стресни ситуации. Некои од начините се практикување присуство (mindfulness), вежбање техники на дишење, тренинг, т.е. физичка активност и доволно сон.
Вежбајте редовно
Photo by Gabin Vallet on Unsplash
Со цел да се поддржи имунолошкиот систем, корисно е да бидеме физички активни. Нашата цел треба да биде два и пол до три часа вежбање неделно. Кардио вежбите и тренинзите за сила, како и нивната комбинација, се добра стратегија за подобрување на имунитетот.
За луѓето кои немаат воспоставена рутина за вежбање, на почетокот може да биде проблематично и предизвикувачко да се одржи континуитетот. Ако ви треба мотивација за да започнете да се движите, најдете начини да ги направите вашите тренинзи позабавни и поконзистентни. Променете го редоследот на вежбите, поканете партнер или пријател да ви се придружи и на тој начин направете ја секоја серија вежби попријатна.
На крајот, имајте на ум дека ова не е само краткотрајна задача. Важно е прво да направите лабораториска анализа и да се консултирате со својот матичен доктор за чекорите кои треба да ги преземете.
