Министерството за внатрешни работи отвори истрага по наводите дека двајца млади биле физички нападнати од полициски службеници во Скопје, при што им бил оштетен и автомобилот.
Случајот се однесува на настан од 7 октомври, а за него реагираше и Демократската унија за интеграција (ДУИ), која бара целосно расветлување на околностите.
Според соопштението на МВР, министерот за внатрешни работи наложил Одделот за внатрешна контрола, криминалистички истраги и професионални стандарди да ги испита наводите и да утврди дали постои одговорност кај инволвираните полициски службеници.
„Одделот презема мерки и активности за целосно утврдување на фактичката состојба и околностите на настанот, како и за утврдување на евентуална одговорност на инволвираните полициски службеници“, информираат од МВР.
Од Министерството најавуваат дека по утврдувањето на фактичката состојба ќе бидат преземени соодветни мерки согласно законските прописи, а јавноста ќе биде известена за исходот од постапката.
ДУИ претходно обвини за полициска бруталност врз двајца млади на возраст од 21 и 23 години и побара итна, непристрасна и транспарентна истрага.
Според наводите на младите пренесени од партијата, полицајците им го скршиле стаклото на автомобилот, по што во возилото завршил пиштол. Тие тврдат и дека полициските службеници пукале со огнено оружје, им ги дупнале гумите на автомобилот, а потоа им ги врзале рацете и ги легнале на земја, каде што биле малтретирани.
ДУИ посочува дека овие наводи се разликуваат од тврдењата во интерниот полициски извештај, според кој младите му го одзеле пиштолот на полициски службеник. Партијата бара да се утврди што навистина се случило и да се повикаат на одговорност сите за кои ќе се утврди дека ги прекршиле законските овластувања.
Од ДУИ побараа и оставка од заменик-министерот за внатрешни работи, Астрит Исени, оценувајќи дека е неопходна институционална одговорност за случајот.
Засега, наводите за полициска бруталност не се потврдени со завршена истрага. Надлежниот оддел при МВР треба да ги утврди околностите на настанот и евентуалната одговорност на полициските службеници.