Во Хром, пешачка патека се претворила во коловоз

Покрај СОУ „Кочо Рацин“ во Хром постои пешачка патека која служи за полесен пристап на учениците од населбата да стигнат до училиштето.

Но, она што често може да се забележи е дека голем број возачи одлучиле дека тука може да искористат опција да го скратат патот кога излегуваат од Хром или влегуваат во населбата. Сообраќајни знаци и одбележја дека се работи за коловоз нема, но за волја на вистината, нема ниту знаци дека е пешачка патека, не е обезбедена со столпчиња, ниту пак има некаква рестрикција за движење на возила. 

Со оглед на тоа што патеката е изработена со бехатон плочки, а не со асфалт, а завршува со земјен пат кој се приклучува на улицата „Македонска војска“, која ги дели Хром и Ѓорче Петров, со сигурност може да се каже дека не е коловоз. 

Од друга страна, поради тоа што патеката е тесна, возилата мораат да се движат со намалена брзина, а често има и пешаци и велосипедисти кои се движат таму, па може да се заклучи и дека воопшто не се добива на време доколку наместо по коловозот, се импровизира по оваа патека.