Најубавите вести не се оние кои се поврзани со политиката , туку оние што покажуваат колку талент, труд и посветеност има во младите луѓе.
Оркестарот на СУГС „Орце Николов“ постигна извонреден успех освојувајќи го првото место на Меѓународниот натпревар IYMC. Благодарение на овој резултат, младите музичари добија покана да настапат во Њујорк – признание што ретко му се укажува на еден училишен оркестар од Македонија.
Тоа не е само личен успех за учениците и нивните професори, туку претставува можност македонската музика, традиција и култура да бидат претставени на една од најзначајните светски сцени. Зад ова достигнување стојат години вежбање, откажувања, дисциплина и љубов кон музиката. Но, како што често се случува во нашата држава, најголемата пречка не е талентот – туку финансиите.
За патувањето и настапот во Њујорк потребна е финансиска поддршка. Затоа оркестарот упати повик до институциите, компаниите и сите кои можат да помогнат, за овој историски успех да не остане само покана на хартија.
Кога младите ја претставуваат Македонија со знаење, уметност и квалитет, нивниот успех станува успех на сите нас. Да покажеме дека знаеме да ги препознаеме и поддржиме оние што нè прават горди – не само кога ќе се вратат со признанија, туку и кога им е најпотребна нашата помош за да стигнат до нив.
