Скопјанец грабнал дете, му се заканувал и го терал да питачи

Одделот за сузбивање на организиран и сериозен криминал поднесе кривична пријава против Ќ.К. (60) од Скопје поради постоење основи на сомнение за сторено кривично дело „трговија со дете“.

Пријавениот искористил згодна прилика и грабнал 11-годишно дете, кое престојувало во Прифатен центар за бездомни лица „Чичино Село“ во с.Сарај, по што го однел во својот дом каде навечер го чувал заклучен, а преку ден го принудувал на питачење.

-На 25-ти септември детето било пресретнато со патничко возило во кое, освен пријавениот, биле уште две непознати лица. Се обиделе да го намамат со тоа што на детето му кажале дека неговиот татко е во возилото, но тоа одбило да влезе во возилото. Во тој момент едно од непознатите лица излегло од возилото и насилно го внел.  Потоа, со употреба на сила, го однеле во домот на пријавениот и го сместиле во просторија без прозорци, осветлување и мебел и го држеле заклучено. Воедно, му се заканиле дека врз него ќе употребат физичка сила доколку не биде мирно. Следните денови, пријавениот го носел детето во близина на стоковната куќа „26 ти Јули“ и го принудувал да питачи. Цело време тој бил во негова близина и му ги одземал собраните пари од питачењето. На 29.09.2017 година, пријавениот го принудил детето да питачи пред трговски центар „Веро“ на бул. „Кузман Јосифовски Питу“, информираат од полицијата.

Случајот бил пријавен во полиција од страна на родителите на детото, по што била распишана потрага.

-На 29.09.2017 година околу 13.45 часот неговиот татко го забележал детето во близина на трговскиот центар “Веро“, а пријавениот побегнал од местото, информираат од МВР.

Пријавениот бил приведен и изведен пред судија на претходна постапка, при што му е одредена мерка притвор во траење од 30 денови.