Општина Гази Баба ги додели решенијата за субвенции за набавка на велосипеди, со што продолжува поддршката на граѓаните преку мерки насочени кон подобрување на квалитетот на животот и заштита на животната средина.
Градоначалникот Бобан Стефковски истакна дека општинскиот буџет е буџет на граѓаните и дека средствата се трошат рационално и одговорно, со цел да се создадат повеќе можности и директна поддршка за жителите.
Според него, субвенциите не претставуваат само финансиска помош за купување велосипед, туку и инвестиција во поздрави животни навики, намалување на загадувањето и подобрување на сообраќајната култура.
„Секој нов велосипед на улиците значи помалку загадување, помал сообраќаен метеж и поголема грижа за здравјето на граѓаните“, порачаа од општина Гази Баба.
Од локалната самоуправа најавуваат дека и во иднина ќе продолжат со реализација на мерки и проекти кои носат директни придобивки за граѓаните, со фокус на транспарентно управување и вложувања што создаваат долгорочна вредност за заедницата.
На добитниците на субвенциите им беа упатени честитки и желби за безбедно и пријатно користење на новите велосипеди.
