Утринава порталот МКД.мк објави дека студенти без додипломски студии на Филозофскиот факултет при УКИМ во Скопје биле запишувани на магистерски, а потоа и на докторски студии. Откако ова било откриено од Државниот просветен инпекторат и студиите им биле прекинати на запишаните студенти.
Според сознанијата на порталот, се работело за десетина запишани студенти на магистерски и докторски студии, на кои по интервенција на инспекторите им биле прекинати студиите.
Веста на МКД.мк ја пренесе и Скопје Инфо, а во коментарите под објавата на нашата Фејсбук страница, со коментари се огласија двајца професори, токму од Филозофскиот факултет. Станува збор за професорите Маја Геровска Митев и Горан Ајдински.
„Би било коректно кога информирате да ги дадете сите информации. Настанатата ситуација е резултат на период во кој важеле правни акти/правилници, согласно кои студенти со завршени стручни студии на прв циклус (180 кредити) и завршени втор циклус студии (60 кредити) можеле да се запишат на академски студии на втор и трет циклус. Студентите имале комплетирано образование кое се барало, факултетот постапил согласно постоечките правилници. Потребно е време да се разреши ситуацијата во најдобар интерес на студентите. Вашите некомплетни информации највеќе им штетат на студентите“, гласи коментарот на професорката Геровска Митев.
Професорот Горан Ајдински, пак, напиша: „Запишаните студенти се со дипломи. Имаат завршени стручни студии, не академски. Има спорни одредби во нормативните акти каде јасно се пропишува дека не може да бидат запишани, но има и одредби каде може и под посебни услови. Инспекторатот постапи, но постапката не е завршена. ЗНАЧИ, проверете ги убаво информациите без сензационални наслови "без дипломи"...!? И не е само на Филозофски факултет“.
Од друга страна пак, претходно денеска министерката за образование, Весна Јаневска потврди дека на Филозофскиот факултет имало нерегуларности при упис на магистерски и докторски студии.
„Констатирани се нерегуларности на Филозофскиот факултет, но не при упис на додипломски, туку при упис на постдипломски, втор и трет циклус студии. Државниот просветен инспекторат постапуваше, донесе заклучоци, го информираше факултетот. Факултетот треба да постапи и, колку што мене ми е познато, постапува. Јас го чекам конечниот извештај, откога ќе помине рокот за постапување за да, како овластен министер во таа област, го донесам и конченото решение“, рече министерката денес одговарајќи на новинарски прашања по едукативниот настан за основци во Скопје „Зеленикс – од предизвик до иновација“.
