Обвинение за две лица кои извршија грабеж во „Нептун“

Основното јавно обвинителство Скопје информираше дека е поднесено обвинение против две лица кои извршиле грабеж во „Нептун“.

„Двајцата обвинети, на 29.11.2024 година, со електрични тротинети дошле до продавница за бела техника „Нептун“ во Градскиот стадион, маскирани со маски, шалови, качулки и ракавици, како и со пластични пиштоли во рацете. Едниот од нив на појасот носел и рачно изработена направа од два факли – пиротехника. Влегле во продавницата во која во моментот имало повеќе возрасни вработени лица и купувачи, како и три деца, па на присутните им се заканиле со наводното оружје. Од продавницата, под закана дека ќе нападнат врз животот и телото на присутните, одзеле 554.146 денари и уште 43 ваучери во вкупна вредност од 115.000 денари. Обвинетите потоа ја напуштиле продавницата, меѓутоа во непосредна близина биле затекнати од полициски службеници кои ги уапсиле“, се вели во соопштението.

Од обвинителството додаваат дека јавниот обвинител до Основниот кривичен суд Скопје има доставено предлог за продолжување на претходно определената мерка притвор за двајцата обвинети.