Новиот балансер не претставува провокација кон коалициските партнери во Владата, туку е почитување на веќе утврдените закони вели министерот за јавна администрација, Горан Минчев, во одговор на критиките од „Влен“ дека новиот балансер за вработување во јавната администрација, базиран исклучиво на попишаното резидентно население, е провокација кон Албанците поради намалување на нивниот процент. Според министерот, балансерот е веќе затворена тема и се применува во практика.
„Најмалку имам намера да провоцирам еден од нашите коалициски партнери. Исклучиво спроведуваме закони, а еден од принципите на кои е склучена оваа коалиција е и почитување на законите. Јас само спроведувам закони. Во Законот за вработените во јавниот сектор децидно пишува дека алатката балансер се применува исклучиво за граѓаните што живеат на територијата на Република Македонија, а тоа е резидентното население во согласност со податоците од последниот попис. Јас се надевам дека колегите од ‘Влен’ ќе се вразумат, ќе потрошат повеќе внимание на читање на постојните закони и ќе се посветат на спроведување на овие закони, а нема да се занимаваат со дневно-политички теми“, рече министерот Минчев.
Тој нагласи дека основната заложба на оваа Влада е етничкиот предзнак да не биде принцип за вработување, на што допрва ќе работат.
„Мислам дека е дојдено време во администрацијата да се вработуваат луѓе врз база на знаење, на квалитет, со цел да имаме силна ефикасна и добра јавна администрација. Но, тоа е второто начело, првото е да имаме квалитетни закони, токму овие за кои денес разговараме, а за кои исклучително важно е да бидат применливи, да бидат системски закони. Ако го постигнеме ова, тогаш можеме да разговараме за втората фаза за добра и квалитетна администрација врз база на знаење и квалитет“, рече министерот Минчев.
Тој денес извести дека ги повлекол од собраниска процедура предлог-законот за административни службеници, предлог-законот за вработени во јавниот сектор, и предлог-законот за стручно усовршување и обука на административните службеници. Предлог-законите ќе бидат ставени на ЕНЕР, каде што сите заинтересираните ќе може да дадат забелешки и сугестии, а истовремено во следните два месеца ќе се организираат јавни дебати и дискусии за нив.
