Од јавното препријатије за грижа и заштита на бездомните животни Лајка велат дека Скопје се соочува со неприроден прилив на бездомни кучиња. Тоа според нив се случува на одредени локации каде се има прецизен увид на постоечката популација на улица која е стерилизирана, и повеќе од очигледно е дека станува збор за организирано дислоцирање на кучиња.
„Неретко станува збор за големи раси на кучиња. Голем дел од нив се недоверливи и ова не е карактеристично за кучиња од градска средина. Овој наплив логистички е речиси невозможно да го направи поединец. За ова сведочат и дел од граѓаните“, велат од Лајка
Од таму додаваат дека имаат и сведоштва на жители кои забележале поголеми групи на кучиња во нивните населби
„Ги знаеме убаво кучињата во нашата населба кои немаат сопственици, тоа се локално чувани миленици кои редовно ги храниме, имаат свои куќарки. Пред неколку дена забележавме група од 4, 5 кучиња без обетка на увото. Едното беше повредено, откако го однесовме на ветеринар да го прегледа, тој ни кажа дека станува збор за куче донесено од друг град, бидејќи чипот што го имало кучето е на јавното комунално претпријатие од овој град, велат жители на Аеродром.
Еден жител на Лисиче, кој побара анонимност, сподели дека бил сведок на истоварање на околу дваесетина кучиња од комбе со кумановски регистарски таблици во темните улички зад средното училиште СУГС „Владо Тасевски“, се вели во соопштението на Лајка
Од Лајка упатуваат апел до граѓаните доколку видат активности од ваков тип, дислокација на кучиња, по можност да го документираат истото со фотографии, пријават или да се обратат за потребна помош. Додаваат дека е неопходно институциите и општините да го покренат ова прашање, воспостават контролни механизми за превенција и дејствување.
