Оваа супа е пример како едноставни, сезонски состојки можат да ни помогнат да припремиме јадење што изгледа елегантно, а истовремено е мошне хранливо.
Кремастата текстура доаѓа од добро сварено и изблендирано цвекло, додека киселкастата нота од јогуртот ја балансира целата чинија. Печурките, лесно запечени, додаваат убав вкус, па така супата не делува „лесна“ или празна, туку заокружена и задоволувачка. Ова е совршена супа за студени денови, но и како предјадење кога сакате нешто што изгледа посебно, а не бара комплицирана подготовка.
Состојки (за 4 порции)
3 средни цвекла, излупени и исечени на коцки
1 средна главица кромид, ситно сечкан
2 чешниња лук
1 среден компир (по желба, за поголема кремастост)
1 лажица маслиново масло
околу 700 мл зеленчуков бујон или вода
сол и бибер по вкус
малку сок од лимон или јаболков оцет (по вкус)
За печурките:
150–200 г печурки (шампињони или лисичарки)
1 лажичка маслиново масло
малку сол и бибер
За сервирање:
густ јогурт или павлака
свежи билки (мајчина душица, магдонос или копар)
Подготовка
Во тенџере загрејте маслиново масло на умерен оган и додајте го кромидот. Пржете неколку минути додека да омекне и стане стаклест, без да потемни. Додајте го лукот и промешајте кратко, само колку да пушти арома. Потоа додајте го цвеклото и компирот, промешајте и оставете сè заедно да се динста уште две до три минути.
Прелијте со бујон или вода, колку да се покријат состојките. Посолете лесно, поклопете и оставете да се вари на тивок оган околу 25–30 минути, додека цвеклото и компирот целосно не омекнат. Кога ќе се сварат, тргнете од оган и изблендирајте со рачен блендер додека да добиете мазна, кремаста текстура. Доколку супата е премногу густа, додадете малку топла вода или бујон. На крај зачинете со бибер и неколку капки лимон или оцет за свежина.
Додека супата се вари, подгответе ги печурките. Во тава загрејте малку маслиново масло и додајте ги печурките исечени на парчиња. Пржете ги на посилен оган додека да добијат златна боја и да испари вишокот течност. Зачинете со сол и бибер и тргнете ги на страна.
Сервирање
Супата сервирајте ја топла, во длабоки чинии. Одозгора додадете неколку лажици јогурт или павлака и со лажица направете лесен вител. Распоредете ги запечените печурки и завршете со свежи билки. По желба, можете да додадете и неколку капки маслиново масло за дополнителна арома.
