Груби – Галовеј: Реформите во земјата не можат да бидат жртва на кризата предизвикана од Ковид-19

Владата останува посветена на остварувањето на своите стратешки цели, и на исполнување на обврските на земјата кои произлегуваат од нејзиното целосно членство во НАТО, како и на забрзувањето на процесот на членство во Европската Унија., изјави првиот вицепремиер и министер за политички систем и односи меѓу заедниците Артан Груби на денешната средба со амбасадорката на Обединетото Кралство во Република Северна Македонија Рејчел Галовеј.

Како што соопштија од кабинетот на Груби, тој за време на состанокот со Галовеј, изрази оптимизам дека Министерството за политички систем и односи меѓу заедниците ќе прикаже еден добар мозаик на Република Северна Македонија во однос на застапеноста и обележјата на сите етнички заедници.

Првиот вицепремиер пред британската амбасадорка истакна дека правичната и соодветна застапеност е уставно право и дека треба да се почитува принципот: „Колку повеќе државата е лојална кон граѓаните, толку повеќе граѓаните ќе бидат лојални кон државата“.

Груби, исто така, се посочува, и соопшти на амбасадорката на Обединетото Кралство,  дека патот до неселективна правда и владеењето на правото може да се постигне само преку целосна транспарентност и ветинг на јавните службеници, судиите и обвинителите. Тој на овој состанок, како што се наведува, ги споменал и случаите Сопот, Монструм, Алфа и малиот Алмир.

Амбасадорката Галовеј и Груби, исто така, разговарале и за транспарентноста и функционирањето на институциите за време на пандемијата и нивната посветеност за справување со истата.

Првиот вицепремиер Груби и британската амбасадорка Галовеј, се додава, разменија мислења и за актуелната состојба предизвикана од пандемијата КОВИД-19, за последиците од оваа состојба врз економијата и за сите важни демократски процеси во земјата. Двајцата, се наведува, се согласија дека реформите во земјата не можат да бидат жртва на кризата предизвикана од Ковид-19 и дека истите треба да се спроведат без никакви прекини.

Груби и Галовеј ,размениле мислења и за други политички теми во земјата и пошироко, стои во соопштението од кабинетот на првиот вицепремиер.