Филмот "Париз може да почека" од 25 мај во скопските кина

Шармантната приказна, или поточно комедија полна со добра храна, добро вино и одлична глума "Париз може да почека" со Дајана Лејн, Алек Болдвин и францускиот глумец Арно Вијар, од 25 мај ќе може да ја проследиме и во скопските кина.

"Ајде да се преправаме дека незнаеме кои сме и каде одиме", во тој момент кога Ана (Дајана Лејн) се одлучува да се предаде на моментот, авантурата и да дише со полна плуќа, оваа наизглед едноставна реченица и го менува погледот кон светот.

Дајан Лејн во улогата на Ана, жената на безгрижниот и секогаш зафатен продуцент (Алек Болдвин), тргнува на едно патување во Париз со бизнис партнерот на нејзиниот сопруг. Она што требаше да биде патување од седум часа се претвора во вистинска дводневна авантура. Добрата храна, виното, француски хумор, знаменитостите и романсата ќе и дадат на Ана нова страст за животот, а одговорот на прашањето дали тоа исто така ќе влијае и на нејзиниот брак, ќе дознаеме на самиот крај на филмот.

Режијата ја потпишува осумдесетгодишната Елеонора Копола, сопруга на познатиот режисер Франсис Копола.

"Често сум размислувала за филмовите во кои сум глумела и кои биле пишувани и режирани од мажи, и сцени кои со машки очи биле одбрани за време на монтажата. Дали премногу бараме ако сакаме луѓето да се запрашаат како изгледа целото искуство од женска перспектива?", нагласува Дајана Лејн како нејзин најголем впечаток работејќи на овој филм.