Многу луѓе денес се жалат на болка во грбот. Долги часови седење, работа пред компјутер, користење телефон и недоволно движење постепено создаваат напнатост во мускулите на грбот и колковите.
Photo by Vitaly Gariev on Unsplash
Со тек на време, оваа напнатост може да се претвори во постојана непријатност или болка, особено во долниот дел на грбот. Една од наједноставните вежби што може да помогне е лесно истегнување на грбот и ‘рбетот. Оваа вежба често се препорачува затоа што ја активира подвижноста на ‘рбетот и ја намалува напнатоста во мускулите.
Вежбата е многу едноставна и може да се направи дома.
Прво, спуштете се на подот на колена и на дланките. Дланките треба да бидат поставени точно под рамениците, а колената под колковите. Грбот треба да биде во природна, неутрална положба.
Потоа полека подигнете го средниот дел од грбот нагоре, како да правите мал лак. Главата лесно се спушта надолу, а стомакот се повлекува навнатре. Задржете ја оваа позиција неколку секунди.
Потоа направете спротивно движење. Полека спуштете го стомакот кон подот и благо подигнете ја главата и градите. Грбот се витка во спротивна насока. И оваа позиција задржете ја неколку секунди.
Ова движење може да се повтори 8 до 10 пати, со бавно и контролирано темпо. Целта не е да се направи силно истегнување, туку нежно движење на ‘рбетот кое ја намалува вкочанетоста.
Кога се прави редовно, оваа едноставна вежба може да помогне мускулите на грбот да се опуштат и да се подобри подвижноста на ‘рбетот. За многу луѓе, неколку минути движење во текот на денот прават голема разлика, особено ако поминуваат многу време во седење.
