Сè уште не е есен, но атмосферата веќе потсетува на нови почетоци. Токму сега е најдобриот момент да започнеме со навика која може целосно да го промени нашето тело и ум: пешачење со 10.000 чекори дневно.
Едноставна цел со голем ефект
Идејата за 10.000 чекори потекнува од Јапонија во 1960-тите, кога еден педометар бил пласиран под името „манпо-кеи“, што значи „метар за 10.000 чекори“. Она што започнало како маркетинг-кампања прерасна во глобален здравствен предизвик. Денес бројни научни студии ја потврдуваат користа: ова е едноставен и мерлив начин да внесеме повеќе движење во секојдневието исполнето со седење.
Што велат истражувањата?
Истражувањата покажуваат дека секојдневното одење значително го намалува ризикот од хронични заболувања. Едно големо истражување објавено во JAMA Internal Medicine (2019) покажа дека жени кои одеа во просек по 7.500 чекори дневно имале значително помал ризик од предвремена смрт во споредба со оние кои одеа помалку од 2.700. Друго истражување од 2022 година, кое опфати повеќе од 47.000 учесници, утврди дека 10.000 чекори дневно го намалуваат ризикот од деменција за 50% и од кардиоваскуларни заболувања за 31%. Дури и ако не стигнеме до 10.000, секој дополнителен чекор носи корист.
Психичка рамнотежа и емоционално здравје
Пешачењето не ја зајакнува само мускулатурата и срцето, тоа го смирува и умот. Според Американската психолошка асоцијација, дури и половина час брзо одење може да ги намали симптомите на анксиозност и депресија. Почетокот на септември е совршен момент за ова: воздухот е свеж, сонцето е поблаго, а прошетките после вечера или рано наутро стануваат пријатен ритуал кој носи мир и баланс.
Photo by Emma Simpson on Unsplash
Тежина, енергија и долговечност
Во просек, 10.000 чекори согоруваат 400–500 калории, зависно од брзината на одење и телесната тежина. Ако оваа навика се практикува редовно, може да придонесе за контрола на тежината, подобрување на нивото на енергија и зголемување на виталноста. Истражувањата потврдуваат дека луѓето кои секојдневно одат имаат понизок ризик од срцеви заболувања, дијабетес тип 2 и пократки периоди на болест во текот на годината.
Време за нов почеток
Сега, кога деновите се посвежи, имаме совршена можност да ја вклучиме оваа навика во секојдневието. Не е потребна скапа опрема, ниту теретана, само удобни обувки и малку волја. Ако започнеме во септември, веќе до зимата ќе почувствуваме разлика во нашето тело, расположение и енергија.
