Четири лица лишени од слобода од вкупно пет пријави за семејно насилство во последното деноноќие.
Од Министерството за внатрешни работи споделија детали за сите инциденти.
Синоќа во 23:15 часот во Штип, полициски службеници од СВР Штип го лишиле од слобода Р.С.(39) од Штип,. постапувајќи по претходна пријава дека агресивно се однесувал и се заканувал на неговата поранешна 35-годишна сопруга.
Вчера во 19:00 часот, полициски службеници од СВР Струмица-ОВР Гевгелија го лишиле од слобода Г.А.(38) од Богданци, постапувајќи по претходна пријава дека физички го нападнал неговиот малолетен син. Лицето е задржано во Полициската станица Гевгелија и за настанот се известени јавен обвинител од Основното јавно обвинителство Гевгелија и Центар за социјални работи Гевгелија.
Синоќа во 20:30 часот во Радовиш, полициски службеници од СВР Струмица-ОВР Радовиш го лишиле од слобода Ѓ.С.(29) од Радовиш. Според пријавеното, тој во семејниот дом агресивно се однесувал кон неговата мајка. Лицето е задржано во Полициската станица Радовиш и за настанот е запознаен јавен обвинител од Основното јавно обвинителство Радовиш.
Исто така синоќа во 23:10 часот во струмичко село, полициски службеници од СВР Струмица лишиле од слобода 71-годишна жителка на селото, постапувајќи по претходна пријава дека околу 21:00 часот во семејниот дом физички ја нападнала нејзината 43-годишна снаа. Лицето било задржано во Полициската станица Струмица и за настанот е запознаен јавен обвинител од Основното јавно обвинителство Струмица.
Утрово во 06:00 часот во СВР Скопје, 33-годишна жена од Скопје пријави дека околу 00:30 часот во семејниот дом на подрачјето на Карпош била физички нападната од нејзиниот 49-годишен сопруг, кој и претходно психички и физички ја малтретирал, но досега не го пријавила. Додека, пак, во 06:55 часот во СВР Скопје, 49-годишниот маж пријави дека околу 00:30 часот во семејниот дом на подрачјето на Карпош бил физички нападнат од неговата 33-годишна сопруга и напоменал дека во изминатиот период бил психички и физички малтретиран од неа.
„Се преземаат мерки за расчистување на случаите и по нивно целосно документирање против сторителите ќе бидат поднесени соодветни пријави“, посочија од МВР.
