Бесплатен паркинг за крводарителите на паркиралиштата на ЈП „Градски паркинг“ додека даруваат крв

Крводарителите при дарување крв ќе можат да ги користат бесплатно паркинзите на Клинички центар и пред болницата „Осми Септември“, како и сите други затворени паркиралишта со рампа со кои стопанисува ЈП „Градски паркинг“.

Одлуката за давање согласност на Одлуката за дополнување на Ценовникот на услугите кои ги извршува претпријатието денеска беше едногласно прифатена од советниците на седницата на Советот на Град Скопје.

Како што истакна директорот на ЈП „Градски паркинг“ Бојан Христовски со овој гест им се излегува во пресрет на барањата на крводарителите и на овие хумани граѓани им се дава општествено признание за придонесот што го даваат за здравјето на други луѓе.