Цели семејства се иселуваат од земјава по потрага по лек или здравствена услуга за член од семејството. Здравствениот систем редовно „потфрлува“, а револтот кај граѓаните расте.
Престојнава сабота, 4 февруари, пред Владата е закажан протест за поддршка на лицата со цистична фиброза за кои државата не е способна да обезбеди лек. Најави за масовност на протестот искажаа голем број други категории за пациенти кои се незадоволни од задрвствениот систем.
Свој коментар на темава даде и Адил Бакиу кој инаку е лице со телесен инвалидитет.
-Кога јас бев мал, ние болните ги праќавме нашите здрави членови од семејството во туѓина бидејќи немавме пари, но здравствениот систем беше прилично - здрав. Не гледавме смисла и потреба да се селиме во странство за да ја добиеме здравствената услуга која ни треба.
После се појавија ајдуци во секоја можна сфера (и влада, и невладини, и секаде измеѓу) па лека-полека испоуништија сѐ и последниве години се почесто слушам за луѓе што ја напуштаат земјава во потрага по здравје, а не по пари, гласи неговиот став.