Во текот на зимските месеци, но и кај луѓе што поголем дел од денот го поминуваат во затворен простор, недостатокот на витамин Д станува многу почест отколку што мислиме.
Photo by Michele Blackwell on Unsplash
Овој витамин не е важен само за коските, туку учествува во имунитетот, енергијата, расположението и правилното функционирање на мускулите. Проблемот е што често не ги препознаваме раните симптоми. Токму затоа вреди да обрнеме внимание на суптилните знаци што нашето тело ги испраќа.
Чести промени во расположението
Еден од најсуптилните, но најважни знаци е необјаснива промена во расположението. Ако во последно време се чувствувате пораздразливо, тажно или емотивно нестабилно, а немате јасна причина за тоа, можно е дефицитот на витамин Д да има улога. Овој витамин учествува во регулацијата на серотонинот, хормон кој влијае на чувството на смиреност и благосостојба. Кога нивото паѓа, расположението може да се наруши дури и ако генерално сте стабилни.
Умор што не поминува
Ако се будите уморни и покрај доволен сон или чувствувате дека ви недостига сила за основни обврски, вреди да размислите дали витамнот Д е во рамнотежа. Недостатокот го нарушува метаболизмот и начинот на кој телото ја користи енергијата. Многу луѓе мислат дека се „преоптоварени“, но всушност им недостига основна поддршка – витамин што најчесто го добиваме преку сонцето.
Почести настинки и ослабен имунитет
Витаминот Д игра важна улога во имунолошката одбрана. Ако забележите дека многу полесно фаќате настинка, дека закрепнувате побавно или дека секоја вирусна сезона ви паѓа потешко отколку порано, можно е телото да сигнализира слабост во системот кој треба да ве штити. Недостигот на витамин Д не значи дека секогаш ќе бидете болни, но може да го намали капацитетот да се одбраните од секојдневните патогени.
Photo by Brittany Colette on Unsplash
Болки во мускулите и коските
Ова е знак што многу често го игнорираме или го препишуваме на лош сон, напорен ден или старост. Но хроничните болки во грбот, колената, нозете или нејасните мускулни болки може да се поврзат со ниско ниво на витамин Д. Тој витамин помага во апсорпцијата на калциум и ја поддржува мускулната функција. Кога недостига, телото станува почувствително, а болката поинтензивна.
Опадната концентрација и тешкотии со фокусот
Ако во последно време ви е тешко да се фокусирате, заборавате ситници или чувствувате „магла“ во умот, можно е причината да е биолошка, а не ментална. Недостатокот на витамин Д може да влијае на когнитивните функции и менталната јасност. Иако овој симптом е суптилен, многу луѓе го забележуваат дури кога нивото на витамин Д значително ќе се подобри.
Што да направите?
Недостатокот на витамин Д е решлив, но важно е да се пристапи внимателно. Најефикасен начин е проверка на нивото преку лабораториски тест, а потоа, во консултација со стручни лица, да се одреди соодветна суплементација. Исто така помагаат и кратки прошетки на сонце, млечни производи, јајца, некои видови риба и редовна физичка активност.
Недостигот на витамин Д не е нешто што го забележуваме веднаш, но телото зборува. Ако на време ги препознаеме суптилните сигнали, можеме да го подобриме не само физичкото здравје, туку и енергијата, расположението и целокупното чувство на стабилност.
