13 лица повредени од гром на плажата Оревче во Охрид

Денеска околу 15 часот гром удрил во близина на плажата Оревче во Градиште, а повредени се неколку граѓани. 

Според МИА, најмалку 13 лица пријавиле повреди или трауми предизвикани од удар на гром во невремето што попладне околу 15 часот го зафати Охридскиот регион. Според информациите, громот удрил на локалитетот „Оревче“ во близина на плажата кај автокампот Градиште на Охридското Езеро.

Станува збор за лица од повеќе градови од државата, од кои четири се здобиле со изгореници на екстремитетите, додека другите воглавно биле без видливи повреди, но се пожалиле на тегоби од претрпениот стрес, како проблеми со слухот, дишењето и тн. Интервенирала службата за Итна медицинска помош и повредените се медицински згрижени во здравствените домови во градот.

Слично невреме во Охридскиот регион имаше пред неколку дена, проследено со краткотрајни, но интензивни врнежи од дожд, наместа град и чести електрични празнења.