Колку алкохол е дозволено да испиете ако планирате да возите?
Ако сте машко, тежите околу 80 килограми, можете да си дозволите да испиете две кригли пиво за шеесетина минути, па да почекате половина час алкохолот да испари од вас, а потоа да седнете зад волан без да стравувате дека може да ве запре полицијата и да ве казни за возење под дејство на алкохол. Немате проблем и ако во рок од два часа испиете еден литар „бунар“ - популарниот пијалак во кој има бело вино, швепс, минерална вода и лимони. Две мали ракии може, третата веќе е проблематична. Доколку сте женско, а ја имате истата тежина и притоа испиете иста количина алкохол, за вас нема да важат истите правила, туку, напротив, сигурно ги минувате дозволените 0,5 промили алкохол во крвта.
Нивото на алкохол во крвта зависи од повеќе работи: колку организмот на поединецот е подготвен да прими алкохол, колку е тежок, каков алкохол консумира, колку време пие, колку време минало откако престанал да пие, дали јадел.
