Во локалната економска зона „Ограѓа“ во населба Илинден влегувааат пет нови инвестиции, информираат од Општина Илинден. Локалната самоуправа преку електронско јавно наддавање оттуѓи пет градежи парцели наменети за лесна и незагадувачка индустрија, со вкупна површина од 30.000 метри квадратни, во насока на интензивирање на локалниот економски развој и привлекување на домашни и странски инвеститори.
Како што се наведува во соопштението на Општината, на овие парцели свои капацитети ќе почнат да градат компаниите „Мултипром“, „Вертиго дизајн“ и „Деус биб“. Според најавите од инвеститорите во новите погони ќе бидат инвестирани околу 8 милиони евра, при што ќе бидат отворени 130 нови слободни работни места.
Овие компании на новите локации ќе градат погони за производство на кондиторски производи, магацински и деловен простор, како и шпедитерско- транспортни капацитети.
Со ова Општина Илинден и натаму останува максимално посветена на предизвикот кон инвестициите и отворањето нови слободни работни места, во насока на подобрување на животниот стандард на граѓаните, а и во иднина ќе се залага за намалување на стапката на невработеност која во моментот е под 10 проценти.
