„Ничија земја“ – нова премиера на МНТ

Во Македонскиот народен театар во завршна фаза се подготовките за претставата „Ничија земја“ во режија на Александар Морфов од Бугарија, кој минатата година во МНТ ја постави и претставата „Животот е прекрасен“.

Претставата „Ничија земја“ е работена по сценариото за истоимениот филм на Данис Тановиќ за војната во поранешна Југославија, награден со Оскар во 2001 година. Премиерно ќе биде изведена во МНТ идната сабота, 3 јуни.

– Таа е сатира против војната и медиумите кои се подигруваат за сензација и рејтинг, во свет измачуван од тероризам и војни, соопшти МНТ во најавата за новата премиера со која ќе биде отворен годинашниот МНТ Фест.

Во претставата ќе играат: Сашко Коцев, Никола Ацески, Александар Михајловски, Гораст Цветковски, Александар Миќиќ, Славиша Кајевски, Александар Ѓорѓиески, Борче Начев, Оливер Митковски, Камка Тоциновски, Ненад Анѓелковиќ, Стефан Спасов, Григор Јовановски, Кристина Гијева, Филип Миленкоски, Александар Иваноски, Марија Кондовска и Томе Станковски.