Излекуван првиот критично болен пациент од Ковид-19 во Шангај

Од болница во кинескиот град Шангај е отпуштен првиот оздравен пациент, кој бил во критична здравствена состојба по заразувањето со новиот коронавирус, пренесоа агенциите. Претходно од заразата се излекуваа само пациентите кои имаа  полесна форма на болеста.

Дијагнозата на 68-годишниот маж била поставена на 23 јануари, откако се вратил од патувањето во својот роден град Вухан – жариштето на новата болест. Тој бил сместен во здравствената установа во критична состојба и лекарите требало да преземат итни мерки заради неговите белодробни проблеми.

По 13 дена минати во кома, на интензивното одделение во болницата, пациентот, меѓутоа, целосно се опоравил, пишуваат агениците.