Гастербајтери во Македонија: Изнајмуваат автомобили и се прават ,,главни” по улиците

Македонските гастарбајтери и странските туристи се најчестите изнајмувачи на возила што ги нудат рентакар агенциите во земјава. Изнајмувањето возила е најактуелно во летниот период (јуни, јули и август), кога нашите привремено вработени во европските држави се враќаат во родните места.

Најчесто нашите гастарбајтери ги земаат возилата од аеродром кога ќе слетаат и повторно ги враќаат назад кога си заминуваат од Македонија.

Клиенти на рентакар агенциите се и странските туристи кои изнајмуваат возило и со него ја шетаат нашата земја. 

Многу често туристите знаат да изнајмат возило и со него прават тури до Црна Гора, Србија, Хрватска, Албанија и потоа возилата ги враќаат назад.

Најчесто се изнајмуваат најмалите, најевтините, односно мини-категориите на возила. Задоволството да се изнајми "шевролет спарк", поло", опел корса" или "сеат ибица" чини од 25 до 35 евра на ден, а за некој полуксузен модел на возило дневно се наплаќаат по 70 до 80 евра.

Изнајмувањето за викендите е нешто поевтино, а на редовните муштерии им следува и попуст.

Притоа, добивате полн резервоар, кој, нормално, по истекот на рокот за користење на возилото треба повторно да го наполните до крај.

Сите возила се осигурани, па и каско, бидејќи се случува да ги вратат оштетени или воопшто да не ги вратат. 

Доколку со изнајменото возило биде направена сообраќајна несреќа и ако причинител за сообраќајката е токму рентаното возило, тогаш се задржува депозитот на клиентот, а остатокот од штетата го покрива осигурувањето. 

Ако, пак, клиентот не е виновен за сообраќајката, штетата се наплатува од осигурувањето. Но, во секој случај, клиентот мора да извести за несреќата и да достави полициски записник, додека помалите сообраќајки се решаваат со европскиот записник.

Кој може да изнајми возило

Од агенциите велат дека покрај кредитна картичка, ако сакате да изнајмите возило, потребно е да поседувате возачка дозвола најмалку две години, како и да сте постари од 21 година. При изнајмувањето треба да се покаже и пасош. Дознавме дека рентаџиите често мора да бидат и "психолози", па така, возилата, што е сосема логично, не се изнајмуваат на оние лица за кои постои и најмало сомневање дека се под дејство на алкохол или дрога. Сигурноста, сепак, е приоритет.